Бүгінгі қала әкімдігінде өткен аппараттық мәжілісте шаһар басшысы Нұрлыбек Нәлібаев күн тәртібіндегі тақырыпты талқыламас бұрын Елорда төріндегі дүбірлі дода, айтыс аламанында «Алтын домбыраны» үшінші мәрте қанжығалап, туған жерге келген Сыр саңлағы Мұхтар Ниязовты мерейлі жеңісімен құттықтады.

Әрдайым мерейіңіз үстем болып, шығармашылық шабытыңыз шарықтай берсін деп ізгі лебізін білдірген қала әкімі қазаққа осындай азамат сыйлап, қанатын қомдап, қолдап отыратын ата-анасына ақынға берген өнегелі тәрбиесі мен өрелі  ақыл-кеңестері үшін ерекше ризашылығын жеткізді.

Өз кезегінде айтыскер ақын қызметтегі міндетін алға тартып, талантына тұсау салмай, өнердегі қадамына қолдау білдірген қала басшысына, әріптестеріне, барша жерлестеріне алғаусыз алғысын айтты.

Айтулы аламанда аймақ абыройын асырып, мерей-мәртебесі биік болған ақынға шаһар басшысы құрметпен «Құттықтауын» табыстап, қазақтың ұлттық аспабы «Домбыраны» сыйға тартты.