БІЛІМ БЕРУ НЫСАНДАРЫНЫҢ САНЫ АРТУДА

Бүгін қала әкімдігінің баспасөз орталығында қалалық білім бөлімінің басшысы М.Әбдіқалықованың қатысуымен Қызылорда қаласы бойынша білім саласында атқарылып жатқан жұмыстар туралы баспасөз конференциясы өтті.

Бүгінгі күні Қызылорда қаласының білім беру ұйымдарында 85 мыңға жуық бала білім алуда. Оның ішінде мектепке дейінгі 240 балабақшада 19 мың 853 бала және 54 жалпы орта білім беру ұйымдарында 63 мың 375 оқушы тәрбиеленуде.

Білім бөлімі тарапынан білім беру ұйымдарын цифрландыру бағытында Қызылорда қаласы бойынша 240 мектепке дейінгі білім беру ұйымдары «Электронды балабақша» автоматтандырылған жүйесіне енгізілсе, мектептердің компьютермен жабдықталуы 100 пайызға, интернет желісіне қолжетімділік 100 пайызға және электронды күнделік жүйесіне қосылу көрсеткіші 100 пайызға жетіп отыр.

Сонымен бірге, білім беру мекемелері үшін оқулықтар мен оқу-әдістемелік кешендерді сатып алу және жеткізу бағдарламасы бойынша қаладағы барлық мектептер 100 пайыз оқулықтармен қамтамасыз етілді.

Биылғы жылы Сырдария өзенінің сол жағалауынан 320 орындық балабақша өз жұмысын бастаса, «Ақсуат» ауылдық округінде орналасқан 120 орындық балабақшаға күрделі жөндеу жұмыстары жүргізілуде.

Білім беру ұйымдарындағы орын тапшылығын шешу мақсатында №198 орта мектебі жанынан 200 орындық және №261 орта мектеп жанынан қосымша 150 орындық ғимараттар салынып, а.ж. қазан айында пайдалануға берілді.

Мұнан бөлек, жыл аяғына дейін Жаппасбай батыр көшесінің бойынан 600 орындық мектеп пайдалануға беріледі деп күтілуде.
Қала тұрғындарының сұранысына сәйкес, "Саяхат" мөлтек ауданынан 300 орындық мектеп, Қызылорда-Жезқазған трассасы бойынан 600 орындық мектеп құрылыстарын жүргізу үшін жобалық сметалық құжаттары әзірленіп, ҚР Білім және ғылым министрлігіне ұсынылды.

Айта кету керек, бұған дейін СПМК және Арай-3 мөлтек аудандарынан 600 орындық, Сырдария өзенінің сол жағалауы мен Қызылжарма ауылдық округінен 900 орындық мектеп құрылысын жүргізу мақсатында жобалық сметалық құжаттары әзірленіп, мемлекеттік сараптаманың қорытындысын алуға ұсынылған болатын.