​Бүгін қаламыздың барлық білім ордаларында жаңа оқу жылы басталып, мектеп табалдырығын аттаған бүлдіршіндерге алғашқы қоңырау соғылды.
​Бұл бір ерекше тебіреніс пен толғанысқа толы күн. Тәуелсіз еліміз - Қазақстан Республикасының тарихындағы, сондай-ақ әрбір азаматтың, мектеп жасындағы баланың өміріндегі елеулі күн. Әсіресе, мектеп табалдырығын тұңғыш рет аттағалы тұрған, жаңа өмірге қадам жасаған бірінші сынып оқушылары үшін ерекше сәт.
​Осындай қуанышты күні қала әкімі Асылбек Шаменов пен қалалық маслихат хатшысы Ибадулла Құттықожаев Ұлт ұстазы Ы.Алтынсарин атындағы №10 мектеп-лицейіне «Алғашқы қоңырау» күнімен құттықтап, ыстық лебіздерін білдіру үшін арнайы келді.
 «Биыл Ыбырай Алтынсарин атындағы мектеп-лицейінің негізі қаланғанына 60 жыл. Бұл мерейтойды барша жерлестерімізбен жоғары деңгейде атап өтуді жоспарлап отырмыз.
Өздеріңіз жақсы білесіздер, Ұлт ұстазы Ыбырай Алтынсарин атындағы киелі шаңырақ ширек ғасырдан астам уақыт бойы күрделі жөндеу көрмей келген болатын. Осыған байланысты жыл басында жергілікті бюджеттен қаржы бөлініп, күрделі құрылыс жұмыстары жүргізілді. Міне, бүгін қайта жаңарған мектеп оқушыларды қабылдауда. Осы ретте, сәулеті мен сәні жарасқан білім ордасының жөндеу жұмыстарын сапалы атқарып, межелі уақытында ұстаздар мен оқушылар игілігіне ұсынған мердігер мекеме басшылығына шынайы алғысымды білдіремін.  
Заманауи сипат алған білім ордасымен қатар, жаңа оқу жылында қаламызда жеке 3 мектеп оқушыларға есігін айқара ашты. Әлемдік өркениетке бет алған бүгінгі қазақ елінің болашағы білім мен тәрбие алауын жаққан мектеппен тікелей байланысты десек, бұл іргелі шаңырақтар талай-талай ел мақтаныштарын тәрбиелеп шығаратынына сенемін»,-деді қала әкімі Асылбек Өмірбекұлы.
​Салтанатты шарадан кейін шаһар басшысы Асылбек Шаменов күрделі жөндеуден өткен мектеп ғимаратын аралады. Айта кету керек, биылғы жаңа оқу жылында қала мектептеріне 1 сыныпқа 7 мыңнан астам оқушы қабылданып отыр.